Grundvöllur lýðræðis og jafnréttis er...

...að við fáum öll að tjá okkur, sama hversu óviðurkvæmilega það er.

Ég get ekki séð með nokkru móti að þetta lag sé áróður fyrir nauðganir.

Var þá ekki eðalpönksálmurinn 'Í nótt' með Fræbbblunum boðun á heilögu nauðgunarstríði gegn konum?

Ég held að Femínistafélag Íslands ætti nú að fara af sínum háa hesti og stinga þessari fölsku siðferðisvitund upp í óæðri enda sína, sama af hvoru kyninu þetta annars ágæta fólk er.

Það er nefnilega staðreynd að þetta er aðför að lýðræðinu í gegnum tjáningarfrelsið, í nafni stjórnmálalegrar réttsýnar og kvenréttinda.

Ég sé ekki hvernig konur skaðast af þessum texta. Þessi texti er ekki um nauðgun eða hvatning til nauðgana. Ég hygg að það segi meira um FÍ og þeirra fylgissveina og meyjar að þau sjái nauðganahvatningu í orðum Baggalúts.

Þetta er ekki nýtt af nálinni. Kellingar af báðum kynjum hafa í gegnum tíðina rembst eins og rjúpur við staura til þess að halda upp vissri siðferðisstýringu, siðferðisstýringu í orði, ekki á borði.

RIAA þurfti lengi vel að setja 'Parental Advisory Explicit Lyrics' á nánast allar plötur, þökk sé Tipper Gore og vinkonum hennar í PMRC.

Lög Megasar voru lengi vel bönnuð í útvarpsflutningi sökum grófra texta.

Hvernig stendur á að fólk sem tilheyrir svona bókstafstrúarbrögðum þarf í sífellu að troða sínu siðferðismati upp á aðra? Þá er ég að tala um bókstafstrú Kristinna, Múslima og Femínista, því að hjá FÍ er þetta löngu komið fram yfir heilbrigða trú á jafnrétti kynjanna (sem er samt vindmylla, það verða aldrei allir einstaklingar jafnir og þar sem bæði kynin eru skipuð einstaklingum verður aldrei algert jafnrétti, en við eigum að hafa sömu réttindi og tækifæri). 

Charles Manson vildi meina að Blackbird og Helter Skelter af 'The White Album' hefðu hvatt hann til morða og þess að stofna til heilags kynþáttastríðs. Var það Bítlunum að kenna að Manson var nöts?

Þá getur það ekki verið Baggalúti að kenna ef einhverjir illa uppaldir krakkar, hvort sem þeir séu nauðgarar eða femínistar, geta ekki hlustað á lag án þess að finna fyrir slíkri sinnissýki að halda að verið sé að hvetja til ofbeldis. 

Hljómsveitin Mammút gaf nýlega út lagið Svefnsýkt (mér finnst Mammút æðisleg, sú hljómsveit var lengi vel í næsta herbergi við bandið mitt) og í því er textinn:

Ég held mér undir þér og ég skal dansa bara og aðeins fyrir þig.
Ég skal syngja bara ef þú temur mig.
Ég verð undir þér og ég skal syngja bara og aðeins
fyrir þig og ég skal dansa bara ef þú hemur mig.

 

Hvað segir FÍ við þessu?

Er þetta ekki stuðlun að neikvæðum kynímyndum?

Hvað með texta Polly Jean Harvey?
'Rid of me':

'Lick my legs, I'm on fire, lick my legs of desire;
I'll tie your legs
Keep you against my chest
Oh, you're not rid of me
Yeah, you're not rid of me
I'll make you lick my injuries
I'm gonna twist your head off, see

Till you say don't you wish you never never met her?
Don't you don't you wish you never never met her?

 

Er ekki beinlínis verið að hvetja kvenfólk til nauðgunar á karlmönnum þarna?

 

Málið er bara mjög fjandi einfalt:

Á Íslandi, lýðræðislegu lýðveldi, skal vera málfrelsi.

Þó að þér líki ekki við textann, þá þarftu ekki að hlusta.

Segi þér einhver að þú sért of veikburða til þess að lifa við frelsi, er verið að gera þig að barni og það er meira niðurlægjandi en að einhverjir galgopar semji einhverja texta sem eru þér ekki að skapi.

Þess vegna er þessi ritskoðunarstefna FÍ niðurlægjandi fyrir konur, því ég veit að konur eru nógu sterkar til þess að lifa við frelsið. 

„Texti Baggalúts snýst ekki um eðlilega hegðun"

Árnað óheilla. Opið bréf til Hr. Johnsen.

Árni minn. Ég er nú ekki eins algjör andstæðingur þinn stjórnmálalega og ég var þegar ég var unglingur.

Þá man ég að ég hreinlega þoldi þig ekki, enda var ég talsvert vinstrisinnaðari og bláeygri þá. 

Sem betur fer eltist það af mér.

En þú ert ennþá sama fíflið.

Hefur ekki stjórn á skapi þínu á útihátíðum, kallar mig og aðra trúleysinga ofdekraða og lætur að því liggja að við séum vart Íslendingar, enda dýrkum við augljóslega kölska...

...lætur hafa þig að fífli með því að kæra konu fyrir að segja eitthvað sem alþjóð veit og missir þig svo í ritdeilur við konu sem hefur unnið sér það til frægðar að klæða sig í svan...

Í svan, Árni Johnsen!

Ég sem hélt að þú hefðir lært eitthvað af því að vera stungið á betrunarhælið hvar þú lærðir skúlptúr... 

...og við það að fá uppreisn æru...

...og ætlaru virkilega að vera það vitlaus, Árni Johnsen, að draga svona smáatriði fram í dagsljósið, eitthvað úr viðtali á útvarpsrás sem enginn með meira en hálfa sellu hlustar á?

 

J'accuse hr. Johnsen!

J'accuse!

 

Ég mæli með því að þú takir til baka þessi eftirfarandi ummæli þín til baka:

Þá er látið undan dekurrófum, trúleysingjum og stjórnleysingjum víða um heim, fólki sem hugsar mest um sjálft sig en síður um að sinna náunganum af kærleik og góðvild.  Fólki sem hugsar ekki mikið um það að rækta lítillæti, þakklæti og auðmýkt, sem er nú grundvallaratriði í því að maður sé manns gaman* án þess að nokkur skemmist.

 

Því ég er viss um að ég sé þakklátari, lítillátari og auðmýkri en þú, og ekki eins og þú, dekurrófa Dlistans, dæmdur glæpamaður sem hefur sýnt að þrátt fyrir að hafa tekið út refsingu sína og hlotið uppreista æru sé hann lítilmannlegur, hrokafullur, iðrast ekki gerða sinna, skertur allri auðmýkt og þakklæti fyrir að fá að taka ennþá þátt í samfélaginu sem hann rændi. Þó að ég sé trúlaus og nánast stjórnleysingi, þá held ég að ég skaði samfélagið minna en þú, Árni Johnsen.

Ritað er:

Hús mitt á að vera lýðræðislega kjörið löggjafavald skipað einstaklingum sem er annt um alla landsmenn, en ér hafið gjört það að ræningjabæli.

 

*Eins þætti mér vænt um, sem meðlimur í Ásatrúarfélaginu að þú færir ekki að leggja Hávamál við hégóma eins og þu gerir þarna. 

Árni stefnir Agnesi

Gott og vel Árni, en...

...og nú veit ég að þú ert ekki talsmaður allra foreldra, en þar sem titillinn þinn hljómar þannig spyr ég:

Er þetta vandamál með drykkju unglinga ekki vandamál sem er tilkomið vegna:

A) lélegs uppeldis að hálfu ykkar

B) lélegs uppeldis að hálfu ykkar 

og

C) lélegra fyrirmynda að hálfu ykkar.

Ég ætla nú ekki að níða mikð þetta starf, en ég sé ómögulega hversvegna fyrir tæki eigi að bera þessa klénu samfélagslegu ábyrgð sem er klínt uppá fólk með því að banna að auglýsa löglega vöru.

Það að banna að auglýsa vöruna gerir hana að Voldemort innkaupana - það verða allir að hafa með þann sem ekki má nefna. Það er nefnilega viss öfugsálfræði í þessu banni, sem er langeffectívust brotin - þá eru áfengisinnflytjendur algjörir rebel og áhrifagjarnir unglingarnir sem foreldrar á Íslandi höfðu ekki tíma til þess að ala upp.

Nú, þá er það spurnginin hver ber ábyrgð á þess afbakaða gildismati Íslendinga?  Hver ber ábyrgð á því að allir eiga að vilja vinna 8-12+ tíma á dag til þess að borga flatskjásjónvarp í barnaherbegið, svo að það þurfi sem minnst að tala við króann.

Hver ætli beri ábyrgð?

Samfélagið sem slíkt fyrir að vera svona ginnkeypt fyrir auglýsingum?

Þeir sem komu kvótakerfinu á laggirnar með bágum efnahagsafleiðingum fyrir fólkið í landinu? 

Þeir sem stóðu að þjóðarsáttinni hérna í denn?

Þeir sem gerðu bjórinn spennandi með því að banna hann og komu með því í veg fyrir siðmenntaða drykkjumenningu hérlendis?  

 

Það eru nefnilega ekki auglýsingar sem gera íslenska drykkjumenningu eins lélega og hún er.

Það er samspil lélegs uppeldis og agaleysis (sem stafar oftar en ekki af úrræðaleysi foreldra, skólar eiga EKKI að ala börnin upp fyrir þig, þó að efnahagsástandið neyði þig í of mikla vinnu), bjórbanns og of mikilla valda templara í gegnum tíðina og svelgihneygð Íslendinga sem verða að gleypa allt sem þeir geta. 

Myndin er sett hér inn svo þið vitið
hvað skal gefa mér í afmlisgjöf 26. Okt.

 

PS: Árni. Starfsmenn áfengisumboða og áfengisframleiðslna þurfa líka að lifa. Ég ætla að mæla með því að þú markaðsetjir hvaða vöru sem er án þess að mega nota eðlilega markaðssetningu. 

Vilja sniðganga auglýstar áfengistegundir

Spurningar fyrir SI:

Myndbandið sem hér fylgir er á engilsaxnesku, fyrir meðlimi Saving Iceland.

Í myndbandinu spyr undirritaður nokkurra spurninga sem brunnið hafa á honum og vonar hann að svör komi frá talsmönnum þessara samtaka.

Góðar stundir.

 

 
©2008 Maack/Arnarvarp.

Sjö mótmælendur handteknir

Skemmtileg einkaræktun...

...á Reykhólum.

Hvort að nafnið hafi ráðið aðsetri þessa manns eða ekki skal ég ekki segja, en þetta er augljóslega einkaræktun, þ.e. í einkaneysluskyni fyrir örfáa aðila, nema að þetta séu þeim mun öflugri plöntur, því fæstar plöntur myndu bera það mikið magn að 4 þeirra nægðu fyrir viðskiptahliðinni, því þetta stæði aldrei undir áhættunni, enda er refsað fyrir sölu á þessum plöntum...

...skyldi þessi einstaklingur fá refsingu fyrir að halda við eigin neyslu?

Hversu margir ætli bruggi göróttan gambra í sama tilgangi?

Ég held að við ættum bara að lögleiða þetta og hætta að sóa skattpeningum í lögregluútilegur og  tíma lesanda í æsifréttir af svona smáatriðum.
Það eru alvarlegri hlutir en eitt reykt húshald á Reykhólum.

Spíttverksmiðjur útum allt land sem framleiða stórhættulegt Methylamfetamín sem er stórskaðlegt efni mæli sterklega með því að leitað sé að 'Faces of Meth' á google, eða upplýsingum um það efni, sem hefur valdið miklum usla bæði vestan hafs og austan tjalds...

Efni sem ólíkt Kannabisefnum dregur fólk til dauða og hefur þúsundir tilfella á skrám útum allan heim.
Ólíkt þessum jurtum sem einn gæji útí sveit er að fara að reykja sjálfur og þar með líkast til ekki að selja börnunum ykkar dauða útum allt land. 

Kannabisplöntur fundust við húsleit

Fordómar.

Ég er eiginlegra á því að það sé ekkert verra en sú barnalega hyggja að flokka fólk saman í kollektív og dæma fólk útfrá slíku í stað einstaklingsins eftir eigin verðleikum.

Þegar fólk er flokkað eftir kynþætti eða trúarskoðunum er flestum sem betur fer nóg boðið, það gera sér flestir grein fyrir því í dag að slíkir fordómar eru skemmandi fyrir umhverfið.

Þá er það spurningin, af hverju fá sumir leyfir til þess að skipta sér frá samfélaginu 'við á móti þeim'? Skiptir það máli hvað 'þeir' eru margir? Eiga Gyðingar einkaleyfi á þessu andskotans grjótfargi sem á að vera útveggur musterisins, sem ku jú vera einn helgasti reitur allra Íbrahímsku trúarbragðanna?

Eru fordómar og ofsóknir afsakanlegri í dag en þau voru fyrir 2000 árum síðan? Hvernig dettur nokkrum að kalla sig kærleiksríkan og trúaðan og styðja samt við bakið á þessum vígamönnum, hvorum vegna við línuna sem er? 

Ég er viss um að eitthvað yrði athugað við það ef hérlendis segðu einhverjir að Lögberg væri bara fyrir Íslendinga, og um leið og vælið heyrðist um kynþáttafordóma yrði sagt HEIÐNA Íslendinga, þá væri ekki verið að skipta fólki í réttir eftir litarhafti heldur trúarskoðunum, þetta er jú eitt helgasta vígi heiðindómsins í landinu og ekki voru það Kristnir sem stofnuðu Alþingi...?

Ég skil ekki þetta hvernig Jón má ekki vera með fordóma gegn ákveðnum trúarhópum eða þjóðum, en bæði séra Jón, mullah Jón og Jón rabbíni og þessir Jónvalsins bullukollar mega það.

Nú ætla ég ekki að boða trúarbrögð pólítískrar réttsýnar. Fjandinn. Það væri fjarri mér, enda PC fyrir mér álíka réttlætanlegt og önnur öfgatrúarbrögð sem stefna að því ljóst og leynt að drepa einstaklingsfrelsið.
 

Hvað Obama er að gera þarna suðurfrá, er spurning sem ég hef ekki svar við. Af hverju í fjandanum er maðurinn ekki að einbeita sér að kosningabaráttu sinni, í því landi sem hann er að bjóða sig fram í.

Ekki það að mér lítist ekki ágætlega á hann per se, finnst hann reyndar ekki jafn flottur og málefnalegur og dr Ron Paul sem ég styddi ef ég hefði tækifærið til, reyndar er dr Paul að segja eitthvað af viti og það vita allir hversu hættulegt það getur reynst stjórnmálamönnum.

En eru þetta ekki viðurstyggilegir fordómar frá Ma'ariv? Þeir láta það í veðri vaka að persónulegt samband Baracks Obama við ímyndaðan vin hans sé óraunverulegra en þeirra sökum þess að hann er ekki af sama kynþætti og þeir. Ég hefði eimmitt haldið að þetta væru ranghugmyndir hjá þeim öllum, en það breytir því ekki að fólk hefur jú leyfi til þess að hafa slíkar bábiljuskoðanir. Þar er nefnilega hundurinn grafinn.

Ég hljóma æði oft eins og ég beri mikla fordóma þó að ég sé oftar en ekki að fordæma fordóma. Hljómar máski asnalega, en þegar við erum að tala um skoðanir, lífsmynstur, trúarbrögð, stjórnmálaskoðanir, hvort þú borðir eingöngu grænmeti og viljir tantra höfrunga eða gleypa við öllu sem einhver Karl í kjól segir þér þá er það eitthvað sem þú ræður alveg við. Þú breytir ekki um þjóðernislegan uppruna eða kynþátt, en djö... á maður ekki að ráða sínum eigin huga, sínum eigin skoðunum? 

Ég er hvorki hrifinn af andlýðræðislegri stefnu Envers Hoxha að banna trúarbrögð né öðrum gerræðishyggjuöflum sem vilja ráða hug borgaranna, en maður fer nú að hallast að því þegar fordómar eins og þeir sem leynast hér hjá Ma'ariv eru afsakaðir með trúarskoðunum, eða eiga rót sína í trúarskoðnum, að það sé spurning um að endurskoða afstöðu sína. 

Hugsuðurinn og möltufálkinn Edward de Bono kynnti fyrir heimsbyggðinni svokallaða Hliðræna Hugsun sem notast skal til skipulagðrar sköpunar. 

Árið 2000 stakk de Bono upp á því við nefnd breska utanríkisráðuneytisins að Ísraelum og Palestínumönnum gengi svona illa að semja frið vegna Zincskorts sem stafar af óhefuðu brauði,  þ.e. einskonar flatbrauði, en meðal aukaverkana zincskorts er árásarhneigð. Þess vegna stakk de Bono uppá því að til þess að Arabar og Gyðingar lykju nú loks deilum sínum þyrfti að senda þeim Marmite sem er einskonar mysingur Breta.

Ég ætla nú ekki að segja að það sé næringarskortur af þeim tagi sem heldur uppi deilum heimsins. En ég er nokkuð viss um að andlegur næringarskortur gerir fólki auðvelt að hata nágranna sinn. Hver veit, einhvern daginn munum við sjá frið í miðausturlöndum, hver veit, máski munum við sjá vináttu og virðingu milli fólks óháð trúarskoðunum og þjóðerni.

Ég ætla að vona að við gerum það einhvern daginn. En við gerum það aldrei á meðan við látum það viðgangast að við séum hjarðdýr. Ef við gleymdum því í smá stund að við tilheyrum fjölskyldum, trúarhópum, þjóðernum, stjórnmálaflokkum og svo framvegis og förum að muna eftir því að við erum einstaklingar, gengur okkur kannski betur.

Ef við munum eftir því að við getum aðeins borið ábyrgð á okkur sjálfum og eigin gjörðum þá fer okkur kannski að vegna betur. Blóðsamviska og blóðhefnd verða annars allra okkar bani.

 

 

Á ég að gæta bróður míns? Það má vera, en ég tek ekki ábyrgð á gjörðum hans því hann er jú fullorðinn maður. 

Trúnaður við Grátmúrinn aðeins fyrir gyðinga?

Nýköttaður.

Ég ákvað í einhverju bríaríi í kvöld að raka á mig kanahamb.

<- Þetta er náttúrulega öskrandi hrópandi hressleiki

Ég vil þó vekja athygli á því að þetta er bara klipping. Engin yfirlýsing. 

Ég vil tileinka þetta myndband...

...ríkum Íslendingum, en þó sérstaklega þeim sem hafa hagnast vegna ósanngjarnra viðskiptatækifæra, samanber einokun og þetta bölvaða kvótakerfi, hagsmunatengsl við ýmsa valdhafa síðustu 30 ára og almennrar glæpamennsku.

Sérstaklega vil ég þó tileinka þetta lag ástkærustu glæpamönnum Íslandssögunnar, þeim sem komu kvótakerfinu á fótinn og bera með því óbeint ábyrgð á örbyggð, örkumli og óhamingju fleiri hundruða ef ekki þúsunda íslenskra fjölskyldna, hruni sjávarbyggða sem eitt sinn voru gullslegnar. Þeim mönnum sem komu verðlagi á fiski innanlands svo hátt uppúr öllum þjófabálki að aðeins þeir sem eiga kvóta hafa efni á því að snæða mikið af fiski, tja, nema ef maður stelur fiskinum, en mér finnst ég vera að segja sama hlutinn tvisvar.

Ég vil tileinka þetta lag þeim mönnum sem bera mesta ábyrgð á því að misskipting á Íslandi hefur aldrei verið meiri, ég vil tileinka þeim sem setið á Austurvelli og rænt hvern einasta Íslending daglega í lengri og skemmri tíma fyrir tilstilli þessa kerfis og þá sérstaklega vil ég tileinka þetta Halldóri Ásgrímssyni sem ber mestu persónulegu ábyrgð á stæsta mannréttindabroti og ráni Íslandssögunnar, en aðrir kvótaerfingjar og kvótaeigendur í stjórnmálum, þá sérstaklega vissir meðlimir stóra Quislingaflokksins sem eiga u.þ.b. 2-3.000.000.000 Ikr ránsfeng frá þjóðinni og spila sig þó góða mega taka þetta til sín líka.

 

Verði þjóðinni þeir að góðu.

Já... en... ég meina...

Er ég þá ennþá unglingur, þó ég sé nær 30 en 20?

Ég hefði eimmitt haldið að unglingar væru ólögráða einstaklingar, eða í það minnsta ungt fólk sem ekki hefur ennþá aldur til drykkju og annars?

Er þetta skynsamlegt?

Hversu margar kynslóðir hafa ferðast um landið sauðölvaðar sem unglingar og kynnst þannig landinu og orðið ástfangnar af fögru landi ísa?
Eigum við ekki bara að drepa það?  Ég veit að kynslóðin sem núna er að vaxa úr grasi gæti ekki fundið Ásbyrgi eða Þingvelli á korti og það heyrir til heppni og hendinga að þau geti bent í humátt til Akureyrar.

Á þetta að vera stefnan? Það er nóg með það að innanlands landafræðikennsla var hræðileg þegar ég var á grunnskólaaldri og því haldi margir jafnaldrar mínir að Kárahnjúkar hafi verið eitthvað sérstakir, en á nú alveg að drepa niður allan ferðavilja innanlands?

Það er ekki nóg með að bensín sé orðið það dýrt að það sé talsvert ódýrara að fljúga austur til Danmerkur en austur á firði, heldur er fullorðnu fólki undir þrítugu beinlínis bannað að mæta á svæðið nema að það dragi foreldra sína með sér (sem eru væntanlega komin á aldur við manninn sem fjallað er um í fréttinni og því líkleg til að halda partí), nema í þeim tilvikum sem fólk hefur orðið þeirrar  ó/gæfu aðnjótandi að hafa holað niður enn einum vanþakklátum þjóðfélagsþegn framtíðarinnar!?! 

Ég hefði talið að þetta væri frekar óeðlilegt. Ég má nefnilega bjóða mig fram til Alþingis, ég gæti þessvegna orðið Forsætisráðherra (forði okkur frá því, þá sérstaklega mér), ég má gifta mig, eignast börn, stunda allt það sóðalega kynlíf sem ég vill (svo lengi sem það er með öðrum fullorðnum samþykkum einstaklingum að sjálfsögðu), drekka hvað sem ég vill (svo lengi sem búið er að borga F@%$ings skattinn af því) og nokkurn vegin haga lífi eftir eigin höfði, en ég má ekki tjalda úti á landi til þess að njóta fósturjarðarinnar sem mig ól? 

Má ég ekki, einhleypur maður á 27nda ári, fara og njóta náttúrufegurðar lands míns? Lands sem ég hef ferðast um frá blautu barnsbeini og þekki nokkuð vel (nema Vestfirði, ég ætlaði einu sinni að sækja þá heim, en það var lokað vegna breytinga).
Þarf ég að hola niður einhverjum krakkaskratta til þess að vera gjaldgengur sem þjóðfélagsþegn og mega tjalda?
Eða ætti ég að ná mér í svona &#39;sykurmömmu&#39; sem er komin vel yfir þrítugt, til þess að hún geti vottað fyrir að ég sé ekki að fara að mynda með mér óeðlilega hópamyndun?

Og hvað á það saurlega hugtak að þýða annars? Óeðlileg hópamyndun!?!

Óeðlileg hópamyndun er fyrir mér það þegar fólk safnast saman til þess að hlýða á tónlist krúttkynslóðarinnar, það er svo margt rangt við það að ég er viss um að það teljist óeðlilegt að fólk sem á að vera komið til vits og ára en gengur með lókinn í annari og snuðið í hinni, sitji einhverstaðar og hlusti á einhverja tónlist sem hljómar eins og ráðvillt hnýsa í sjávarháska. Gallinn er að það er fagurfræðileg hópamyndun í þeim Norðurkjallara eilífðarinnar, ekki aldurstengd.

Mín lausn á vandamálinu er sú að gefa Íslenskum unglingum ferð til Hróarskeldu þegar þau verða annað hvort 18 eða 20. Ég er viss um að það myndi bæta tjaldmenningu hérlendis - ekki þessi hálfvitalega haftastefna. Ég hef farið á tvennar útihátíðir um ævina, annars vegar á Eldborg Bárðarsonar sem var hörmung (eins og flest tónlistin sem var flutt þar) og á Hróarskeldu, ég held að besti skóli í útihátíðum sé þar á túninu, rétt norðan vindmyllunar, en mátulega langt frá útiklósettunum..

En svo er spurning um hvort þessi hálfsjötugi maður sé upphaf nýrrar tízkustefnu í blaðamennsku, sjáum við brátt fyrirsagnir um &#39;Gamlingjavandamál í Miðbænum&#39;? 

Kveikti á ljósavél og hljómflutningsgræjum

Ný skoðanakönnun.

Nú.

Af gefnu tilefni ákvað ég að leita svara hjá ykkur, lesendur góðir, um hvað skal gera í efnahagsmálum Íslensku þjóðarinnar.

Nú er orðið erfitt að fá samþykki fyrir því að gera nokkurn skapaðan hlut. Það má ekki deyða og borða litlu sætu meme, það má ekki virkja og fá peninga í landið til þess að flytja inn vörur, samkvæmt Sea Sheperd eru fiskveiðar glæpir gegn hvalkyninu og hvalveiðar eru glæpir gegn mannkyninu.

Það má bara aldrei ekki neitt í dag og svo furðar fólk sig á því að það skeði aldrei einskis! (SIC)

Því ákvað ég að setja upp þessa skoðanakönnun sem hér má sjá vinstra megin (frá þér séð lesandi góður) á skjánum.

Þar tel ég upp ýmsa möguleika sem við höfum í nútíma lífsbaráttu landans.